خليك بطاطس؟!!!!

خليك زي البطاطس





عارفين ليه...؟!!!!!



اولاً: البطاطس المحمرة هية الاكلة الوحيدة اللي اجتمع الناس كلهم علي حبها .. كبير وصغير كله بيحبها...



ثانيا: الآتي..... شوف بقى:



1- البطاطس المحمرة لما بتتقلي في الزيت بتبقي عادة مقرمشة من بره و طريه من جوه..



عشان كده لما حد يعمل معاك موقف بايخ ومؤلم ماتعاملوش بنفس اسلوبه .. عرفه بغلطه وانك زعلان منه و خد موقف بس خلي قلبك ابيض وطري من جوه "طيب يعني " وماتشيلش في نفسك منه، خليها على الله .



2- البطاطس المحمرة تلاقيها عند ماكدونالدز ( فرينش فرايز) و برضه تلاقيها عند بتاع الفول والطعميه..



يعني انت كمان خليك زي البطاطساية ماتتكبرش علي حد وصاحب كل الناس غني او فقير.. كلنا خلق الله.



3- البطاطس المحمرة بتتقدم مع حاجات كتير : مايونيز، كاتشب، صالصات مختلفة وساعات كمان طحينة بس بتفضل في الاخر اسمها بطاطس..



يعني مهما اتعرضت لثقافات و بيئات مختلفة احتفظ دايما بشخصيتك المستقلة و طريقة تربيتك و خلي الناس هيه اللي تتاثر بيك



4- البطاطس ممكن تبقي شيبسي و هي اول حاجة بنفكر فيها لما بنحس بالجوع و احنا برة البيت..



ساعد الناس دايما و خليك اول واحد ييجي علي بالهم لما يقعوا في مشكلة خليك جدع زي "الشيبسي".



5- البطاطس المحمرة لو اتهرست بتبقي برضه طعمها حلو ولذيذ و ممكن نسميها "بطاطس بيوريه"



لما الدنيا تهرس و تبهدل فيك خليك شخص كويس و لذيذ و طلع للدنيا لسانك و قول "انا بطاطساية بيوريه" ماتفقدش ايمانك ولا تهتز .. الهرس ده خلق لك طعم جديد وبرضه لذيذ ومحبوب من الناس.



يبقى لي حق اقول خليك بطاطس والا لأ..؟!!!